LI SUTURI TE LU TATA

Lu sule stai a punente e sta scurisce,
se sente, rraucàta na cicala…..
nu cane lupu sta rusce e ‘nnamarìsce
inthra ‘nu nitu se sente ‘nu stindicchiu t’ala.
Se ddìscita ‘nu riddhru chiangi-chiangi,
cu lu cri-cri te pizzica lu core,
‘na scialineddhra sta scioca ’nthra l’aranci
…se perdenu le finite ‘ntra stu fore.
Iou sittatu an terra, ncoste a ‘na scala,
‘nu libbru chiusu a manu, su studente;
lu tata tira l’acqua cu se llava,
ni scappa ‘nu surrisu cumpiacente.
Uè tà – ticu ‘ntra mie –, cu le fatie
Te ddhre razze ca zappanu stu fore,
tie tiri l’acqua ca serve sulu a mie
e l’acqua è toa, è fatta te sutore.
Iou mo’, me passa ‘nu pinsieri:
Ma ci nu nc’eri tie cu ddhru gran core
Iou putia fare sulu ‘nu mistieri,
te lu furese….., e tie me uei dottore.
Uè tà, stasira nu te llavare
Si beddhru puru quandu vai mmucatu,
mbrazzate a mie, t’aggiu ringraziare
pe tuttu quiddhru ca m’à sempre datu.
Liberamente da me adattata, da un'idea di G.Diviesto
F.Giordano