LA MAMMA

La mamma è n’authra cosa: lu cirvieddhru,
lu piernu te la casa, lu fiatu, l’armunia;
è quiddhra ca cumanda l’intera cumpagnia;
stai an capu te lu capu te casa: è nu cappieddhru.
An turnu tene sempre capannieddhru,
bbata a mille cose, è comu Maria;
e ci nu se ferma pe ‘na malatia
stai sempre tisa, l’urtimu natu an queddhru.
A ci ‘nu puntu, a ci ‘na facce storta,
a ci ‘nu vasu, a ci ‘n’avvertimentu.
E se capisce la mamma quandu ha morta,
quandu nu nc’ete cchiui sta ruzzuluna:
ca pare ca te ‘ccite ognu mumentu
e dopu ‘nu minutu te pirduna.