LU LAMIENTU TE ‘N’ARVILU TE ULIA

Nu te pinsare
ca iou suntu cchiui l’arvilu te ‘na fiata,
te quiddhri ca li furesi chiantanu ‘nthra llu fiéu
cu li paritieddhri ausati nturnu nturnu,
a ddu ‘nthra pethre e scrasce
‘nc’era cu timi le sacare.

None, figghiu,
la campagna mia l’annu cangiata tutta:
“Centhru-ri-si-tin-ziale” l’ànnu chiamata moi,
e a ci nci abita ete la nublessa,
gente ca nun bole cchiui
cu ni parli alla manera noscia,
percè, me ticenu, ca lu dialettu
ete cosa ca sape te villanu.

Gente sthruita suntu….
E none ca sapenu sulu l’italianu…,
mo’ canuscenu puru
lu parlare te tutte le lingue te lu mundu,
senza cuntare
la lngua ‘ncora cchiù saputa
te li sthréusi.
Iou stessu, figghiu miu,
‘n’arvilu signuru mo’ me sentu.
Me ticenu ca “fazzu onore alla mia razza”,
percene, comu li vecchi signuri te na fiata,
tegnu lu sangu blu inthra ‘lle vine.

E bbé veru, figghiu miu, è la stessa cosa:
ca a quiddhri lu sangu
na ddivintatu niuru
percene vivenu ncafurchuati,
te n’annu all’authru chiusi ‘nthra palazzi;
a mie s’à fattu niuru
pe li parìti ca m’ànu ausati ‘nturnu,
parìti vàuti, fenc’alle stiddhre te lu cielu;
pariti ca m’ànu fattu scerrare
lu sule, lu ientu e puru la ddòre te la terra.
F.G.

31.03.2018